Өнөөдөр буюу 2023.11.16-ний Пүрэв гарагт Өмнөд Солонгост их дээд сургууль болон коллежийн элсэлтийн шалгалтын өдөр болж байна.

Улсын хэмжээнд нийт 504,588 ахлах ангийн сурагчид, төгсөгчид болон бусад хүмүүс шалгалтанд бүртгүүлж 1279 шалгалтын цэгт шалгалт өгнө.

Жил бүрийн арваннэгдүгээр сарын гурав дахь долоо хоногийн пүрэв гарагт болдог шалгалтын үр дүнг оюутнууд болон эцэг эхчүүд их дээд сургуульд элсэх, амьдралынхаа туршид карьераа тодорхойлох гол хүчин зүйлүүдийн нэг гэж үздэг.

Солонгос улс даяар Англи хэлний шалгалтын үеэр анхаарал сарниулах дуу чимээ гарахаас сэргийлж  13:05 - 13:40 цагийн хооронд бүх нисэх онгоц хөөрөх, буухыг хоригложээ.

Онц байдлын үед байгаа онгоцыг эс тооцвол нислэг үйлдэж буй бүх онгоцууд хязгаарлалтын хугацаанд 3 км ба түүнээс дээш өндөрт агаарын орон зайд байх ёстой. Мөн энэ хугацаанд 94 нислэгийн хуваарьт өөрчлөлт оруулна гэж Тээврийн яамнаас мэдээллээ.

Шалгалт өгөх хүмүүсийг шалгалтантын байрандаа хоцролгүй ирэхэд туслах зорилгоор 06:00 цагаас 10:00 цаг хүртэл Сөүл хотын метро болон  автобуснууд нэмэлтээр үйлчилгээ үзүүлж байна.

Мөн Сөүл хотын төрийн байгууллагууд замын түгжрэлийг бууруулах зорилгоор өглөөний 10 цагаас буюу ердийнхөөсөө нэг цагаар хоцорч ажиллаж эхэлжээ.

Хөрөнгийн бирж болон валютын захын ажиллах цаг мөн өглөөний 10 цагаас эхлэн нэг цагаар хойшлогдоно гэж албаныхан мэдэгдлээ.

Эх сурвалж :Ёнхап