АНУ-ын Вашингтон хотын эмнэлэг саяхан коронавирусийн халдвартай өвчтөний уушгины 3D дүрс бичлэгийг дэлгэн харуулжээ. Уг дүрс бичлэгт цусны даралт өндөртэй, 59 настай эрэгтэй өвчтөний уушгины үйл ажиллагаа коронавирусийн халдвар авснаар хэрхэн гэмтэж байгааг харуулжээ. Энэхүү эмнэлэг өмнө нь хорт хавдар, хүнд мэс заслын процессыг л ийнхүү CT дүрслэлийн технологийг ашиглан дүрсжүүлж байсан гэнэ.

Вашингтоны их сургуулийн эмнэлгийн цээжний мэс заслын тасгийн эрхлэгч, доктор Кэйт Мортманы хэлснээр энэ өвчтөн амьсгалын аппаратгүйгээр амьсгалахад хүндрэлтэй байсан ба амьсгалын аппаратыг дээд хүчин чадлаар нь ажиллуулсан ч хангалтгүй байжээ. Мөн өвчтөний цусны эргэлтийг хэвийн явуулж, цусыг хүчилтөрөгчөөр хангах аппаратыг ч мөн хэрэглэх шаардлага гарсан байна.

"Энэ удаагийн өвчтөн бол 70, 80 настай дархлаа дарангуйлагдсан, чихрийн шижинтэй өвчтөн биш. Цусны даралт ихсэхээс бусдаар өөр эрүүл мэндийн асуудал байхгүй хүн л ийм байдалтай байна” хэмээн доктор Кэйт Мортман хэлэв.

Дүрс бичлэг дээр шар өнгөөр ​​тэмдэглэсэн газрууд бол халдвар тархсан, үрэвсэл үүссэн хэсгүүд юм.  Уг бичлэгээс халдвар хүний уушгинд хэрхэн хурдан тархаж байгааг харж болно. Мөн ингэж гэмтсэн уушги эргээд хэвийн байдалд ороход маш их хугацаа шаардагдана гэдгийг Мортман онцлов.