Тээлтийн 36 дахь долоо хоногт буюу дутуу төрсний улмаас эмнэлгийн байнгын хяналтанд байх шаардлагатай хоёр настай монгол хүү БНСУ-д эмчлүүлж байх явдцаа Сувоны Гадаадын иргэн харьяатын газрын ажилтнуудад аавын хамтаар баригдан саатуулах байранд 20 гаруй хоног хоригдож буй талаарх мэдээлэл цахим орчинд тархсан. Тэгвэл хүүг эмчилж байсан “Ажү Дэ” эмнэлгээс нь хүүхдийн эрүүл мэндийн нөхцөл байдлыг тодорхойлсон бичгийг гаргажээ.

Тус бичигт “Төрөх үеийн амьсгалын замын хямрал, уушгины артерийн гипертензийн байнгын синдром оноштой” гэжээ. Тиймээс эмнэлгийн байнгын хяналтад байх шаардлагатай гэсэн байна.

Гэтэл  Сувон  Гадаадын иргэн харьяатын газраас хүүг өнөөдрийг хүртэл хорьсоор байна. Хүүг аавын хамтаар саатуулах байрнаас суллахаар “БНСУ дэх гадаад иргэдийн эрхийг хамгаалах” ТББ болон тус улсад амьдардаг монголчууд хөөцөлдөн ажиллаж байгаа юм. Тэд энэ хүрээнд БНСУ дэх  Монгол Улсын Консулын газрын яаралтай тусламжийн утас руу холбогдоход “Битгий залгаад бай” хэмээн ундууцсан бол Консул хариуцсан ажилтан нь “Ар гэрийнхэн нь “тусламж хэрэггүй” гэж мессеж бичсэн”гэсэн хариуг өгсөн талаар эх сурвалж мэдээллээ. Тэд мөн Сувоны Гадаадын иргэн харьяатын газарт хандан “Танайд ийм өвчтэй хүүхэд хоригдож байна” гэхэд “Битгий худлаа яриад бай” гэжээ.

Хоригдож байх хугацаанд хүүгийн биеийн байдал хэд, хэдэн удаа муудаж эмнэлэгт хүргэгджээ. Эм уулгахаас бусдаар хүүд эмнэлгийн тусламж үзүүлэх боломжгүй байгааг эх сурвалжууд мэдээллээ.

Харин албаны эх сурвалжууд дээрх мэдээллийг үгүйсгэж “Хоёр настай хүүгийн аав өмгөөлөгч авч батлан даалтад гарах хүсэлт өгсөн ч БНСУ-ын гадаадын иргэн харьяатын газраас татгалзсан. Түүний аав жолоодох эрхийн үнэмлэхгүйгээр даатгалын хугацаа хэтэрсэн тээврийн хэрэгсэл жолоодож явж байгаад  баригдсан.Тиймээс тухайн иргэнийг батлан даалтад гаргах боломжгүй гэх байр суурийг илэрхийлж байгаа. Мөн “Хүүг “Ажү Дэ” эмнэлгээс 4-5 настайд нь дахин үзүүлээрэй" гэсэн учир Монгол руу явахгүй” гэж аав нь хэлсэн. Тэрнээс биш хүүг өнөөдөр ч гаргах боломжтой ба аавтайгаа хамт Монгол руу явах боломж бий. Мөн хүүг хоригдож байх хугацаандаа хоёр удаа анхан шатны эмнэлэгт үзүүлэхэд “Хүүгийн биеийн байдал тогтвортой” гэж оношилсон. Ерөнхийдөө Сугвон Гадаадын иргэн харьяатын газарт “Хүүг хориогүй бөгөөд ээж эсвэл төрөл садны хүн нь хэзээ ч ирээд авах боломжтой” гэсэн хариуг өгч байгаа. Мөн аав нь “Эх орондоо харъя” л гэж бодож байвал хүүхдээ аваад өнөөдөр ч явах боломжтой” гэх тайлбарыг хийлээ.